كـلام الـصـمـت

فـضـاء لـصـدى الـصـمـت الـمـؤجــل
 
الرئيسيةاليوميةمكتبة الصورس .و .جبحـثالتسجيلدخول

شاطر | 
 

  نهار شدوني المخابرات بتهمة الانتماء الى جماعة سلفية إرهابية محمد سقراط -كَود

اذهب الى الأسفل 
كاتب الموضوعرسالة
admin
Admin
avatar

عدد المساهمات : 1426
تاريخ التسجيل : 13/08/2011
العمر : 65

مُساهمةموضوع: نهار شدوني المخابرات بتهمة الانتماء الى جماعة سلفية إرهابية محمد سقراط -كَود   الثلاثاء أغسطس 26, 2014 10:29 am



نهار شدوني المخابرات بتهمة الانتماء الى جماعة سلفية إرهابية

محمد سقراط -كَود

ف2007 شي تلاتة أيام من ورا مانفاجر داك الساط فالسيبير فكازا، جاو خداوني من السيبير ديال الحومة، كانت الحملة ديك الساعة، وأنا كنت مربي واحد اللحية فالغالب هي لي كتكون عندي ديما، وطبعا لحية خالية من أي حمولة إيديولوجية، لحية سببها العكز فقط والإحساس بالملل والفراغ واللاجدوى، وبأنني واخا كنبان بشع بيها فراه ماغادي يتغير من واقع حياتي والو الى حيدتها، وحتى حياتي الجنسية أو العاطفية ماغاداش تتأثر.

هاد اللحية ديما كانت كتجبد ليا الصداع وتثير الشبهات، فالحبس تعلقت على ودها، وف2007 تشديت على ودها، أنا كنت كنتردد لواحد السيبير من الجمعة للجمعة لوقيتة ديال صلاة الظهر، حيث السيبير لي حدانا مكيحلش حتى لمن ورا العاصر، وأنا كنكون يالله فقت من النعاس وفطرت، كنمشي ديك الساعة على ماتقاد الواليدة الكسكسو، هي هاديك نتغدى ونمشي للخدمة.

داك النهار مشيت، وكي العادة راه مشيت غي باش نقرى الردود على مواضيعي فمنتدى الملحدين العرب، ونكتب شي لعيبات، ونشاطي مع العشران فالإيميسين واحد الشوية، أنا كالس كنقرى فالمنتدى حتى كيبانلي السيبير تطوق، واحد حط يدو على كتفي وقالي ماتقيس تاحاجة، تلفت نشوف شكون، وأنا لقاهم طوال غلاظ شداد مستفين بحال الى أنا هو أبو بكر البغدادي.

كانوا بالأنواع، ولكن الماركة لي كانت كتعطي الأوامر كانوا لابسين كومبليات ومكرفطين وأنيقين بزاف، كانوا معاهم لحناش ديال الكوميسارية ديال الحومة، وكان معاهم المقدم والقايد طبعا، القايد كان هاز معاه واحد الورقة فيها سميتي وسميت الواليدة والواليد والرقم ديال لاكارط ناصيونال،كان كيسولني الحنشة ديال الحومة، وملي كنجاوب كيشوفوا دوك المكرفطين فالقايد لي كيكون كيشوف فالورقة وكيأكد بالإيجاب بهزة من رأسه على كل جواب كنقولوا، طبعا البوليسي ديال الحومة خاصوا يبان واعر قدام موالين الكومبليات ويبين ليهم أنه كيعرف يتعامل حتى مع الإرهابيين ماشي غي مع صحاب الهيروين والسليسيون والشفارة لي كيظل وسطهم فالحومة.

كان كيسولني ومرة مرة كيسبني وكيقولي: باغي الجنة أولد القحبة باغي الحوريات، من بعد ماقلبني مزيان، بداو كيسولوني على الموقع لي كنت داخل ليه، حيث مقشعوا والو، كيفاش هاد منتدى الملحدين العرب، وكيفاش هادا جينا ناخدوه على أساس أنه سلفي لقيناه كيتصفح هاد المنتدى ياك ماناوي يتفركع فيه، هادوك المكرفطين مكانوش كيدويو بزاف كيكتفيو بتوجيه الأوامر، القايد لي هو تاني سلطة بعد الله والملك فالحومة كان داك النهار تالف ماعارف آش يدير وآش يقول، لي كانوا كيتعاملوا بثقة تامة بحال الى اليومي ديالهم داكشي هوما دوك لمكرفطين، تصفحوا شوية المنتدى، وسبحان الله داك المنتدى كان عامر آيات وأحاديث ماتفرقش بينو وبين منتدى التوحيد غير بالسمية.

وهو ينقز البوليسي ديال الحومة وهو يقول: راه كيهدرو بيناتهم برموز كيعرفوها غي هوما، راه هاد السمية غي تضليل، أنا غي سمعت هاد الهدرة وأنا نقول صافي غرقني هاد مسخوط الواليدين، قرا شوية وهو يلقاني كاتب مقولة ديال محمد شكري: "لا أشرب الماء إلا عندما ينقطع النبيذ... الماء للضفادع".

ناض سي البوليسي وقاليهم هانتومة شتو، النبيذ حيث أحمر يرمز الى الدم، الله أميمتي الله صافي فونداني، بغيت نقوليه راه مقولة ديال محمد شكري وهو يقمعني، طلعوني فواحد البارطنير، يالله ديماراو، قلت للبوليسي، الى كنا غادين بعيد وقف عافاك نتقدى الكارو، قاليا كطنز عليا.

مشينا فاللول للكوميسارية ديال الحومة، عمرليا محضر، من بين ماجاء فيه حرفيا، وكانوا يتواصلون بينهم برموز لا يعرفونها إلا هم، كالنبيذ الذي يرمز الى الدم، من بعد توجهوا بيا للكوميسارية سنطرال، ديريكت لواحد الغرفة فيها جوج مكاتب واحد بحاسوب فالجنب وواحد رئيسي فالوسط بلا حاسوب، وفمؤخرة الغرفة، كانوا كالسين ربعة ديال الدراري وبنت كلهم شباب، وشادين كنانش فيديهم والستيلوات، حسيت براسي بحال شي فأر ديال التجارب.

بدا كيحقق معايا واحد الراجل شيباني، طبعا كانت أجوبتي غريبة وبعيدة كل البعد عما كانوا يسألونني إياه، هوما باغين يشوفوا واش سلفي منتمي لشي تنظيم وأنا كنحلفليهم بالله الواحد القهار أنني مولحيد كافر زنديق مكنصوم مكنصلي، وطبعا ظنو أنني كنتريكل، وهو يبدا التهديد، قالي الشيباني واش غادي تجمع كرك معانا وللى غادي نهبطوك لتحت فين تدوي على خاطرك، شوف المغرب فيه 35 مليون راه نحرقوا 5 باش تعيش التلاتين بيخير(قتليه فخاطري راه قليل هاد الرقم راه خاص تحرق التلاتين باش تعيش الخمسة بيخير)،

دار راسو كعا وناض وجا واحد آخر شاب لابس مزيان ونقي، وكيدوي زوين وقاري بزاف، هاداك قدرت نتواصل معاه وطبعا السيد قرا وتكون غي على هاد السبب، بقينا مجمعين ورجع حتى داك الشيباني، كانوا كيسولوني أسئلة مختالفة وسولوني حتى على رأيي فأحزاب سياسية والجماعات الإسلامية منها العدل والإحسان، دوينا فالفلسفة دوينا فالدين، من بعد سولوني معامن متعاطف، قتليه مع الريال، وهو يرد عليا الشيباني، وهانتا ضحكنا ليك شوية ومتطلعش لينا فوق كرنا، جمعت راسي وقتليه حاليا مامتعاطف مع حد والا كاين شي حزب تنصحني بيه راه ندخليه، قالي : نصحك بحزب لقحاب، قتليه هو لي راني فيه دابا( وطبعا عملت بنصيحة الشيباني حرفيا وهي لي تابع ليومنا هادا، واش كاين شي حد يفهم حسن من المخزن).

دام التحقيق خمس ساعات، انتهى بأن صوروني وكتبوا ليا تقرير، وطلبوا المود باس ديال بواط إيمايل ديالي، وقبل مايطلقوني قاليا الشيباني، سمحلينا الوليدي راك غي تغالطتي ليهم ودابا خاص نفسرو ليهم لحلامة، وهانتا الى حتاجيتي شي حاجة أو شي نهار داوليك السلعة آجي عندي لهنا.

ملي رجعت للدار، قاتلي الواليدة صافي طلقوك دغية، الواليدة مسكينة ملي وصلها خبار أنهم جاو داوني، هبطات للكوميسارية ديال الحومة كتجري، وقاتليهم راه هاداك لي شديتوه جابليكم الله سلفي راكم غالطين فيه، راه مكيعرف مولاه فين جا، وراه ماجيتش عندكم باش تطلقوه جيت باش نطلبكم تخليوه عندكم وتربيوه راه محمقني كيقوليا الله مكاينش، كنت ديك الساعة كنعيش مراهقة الحادية وكنت معصب الواليدة وكندوي فالدين كثر من المتدينين براسهم، كنت كنحس براسي لقيت الحقيقة وراه خاص دابا نعممها، وكنت كنحس براسي متميز على الآخرين لأنني قدرت نفكر مختالف عندهم ونتوصل للحقيقة، طبعا حاليا نضجت وتبدلت، ومابقيتش مولحيد، وليت ممسوق لتاحاجة عدمي خالص.

تفكرت ليوم هاد الحادثة، من بعد ماقريت آش وقع لداك الساط لي رفع الراية ديال داعش فوق سطح دارهم، وشدوه وقاليك طلقوه حيث لقاو عندو فيديوات ديال البورنو فالهاتف النقال ديالو، وبقيت كنتخايل راسي داك النهار لقاوني كنتصفح إكس فيديو بدل منتدى الملحدين العرب، واش كانوا غادي يمشيو بحالهم ويخليوني نكمل فراجتي أو غادي يعتابروا داكشي عاوتاني رموز نتواصل بيها بيننا، وقلت مع راسي من باب الإحتياط الواجب بنادم يعمر الحاسوب ديالو باللأفلام الخليعة، ويدير فواجهة الحاسوب صورة للمناضلة الشهيرة ليزا آن، باش يبان بريئ وبزاف





_________________

عاشق الغجرية في زمن اللاحب
الرجوع الى أعلى الصفحة اذهب الى الأسفل
http://sikal.forummaroc.net
 
نهار شدوني المخابرات بتهمة الانتماء الى جماعة سلفية إرهابية محمد سقراط -كَود
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
كـلام الـصـمـت :: الباب المفتوح :: حوارات :: نقولات :: أدبية-
انتقل الى: